بحبه

بحبه وبيحبني إيه المشكلة يعني

إمبارح بجد كان أسعد يوم في حياتي يوم 17\5 زي مابيقول حبيبي

***********************************

بدون مقدمات وبدون تنحنحات وبدون مللان أسعد يوم في حياتي هو إمبارح يوم 17\5 زي مابيقول حبيبي أنا مش عارفة إزاي قابلته مع إني كنت مانعة نفسي ومنعاه من موضوع المقابلات ده مش علشان إن أنا بعمل كده من ورا أهلي وبس لأ بس علشان المقابلات دي حرام أصلايعني مثلا إمبارح شوفته وقعدت أبحلقله وأتأمل فيه وأبص في كل حتة فيه لأني وبكل بساطة بحبه في حين إن ربنا أمر بغض البصر , يعني انا كده بعمل حاجة حرام , بغضب ربنا , الإنسان الوحيد اللي المفروض مغضش بصري عنه ولا حاجة هو جوزي , وخطيبي كمان.

الفكرة إن هو بإذن الله اللي هيكون جوزي وخطيبي , فهل حلال إني أبصله كده ولا حرام؟؟؟ طب ماهو ممكن ميحصلش نصيب؟؟

مش عارفة , بصراحة أنا بحبه ومش بقدر ومش هقدر أشيل عيني من عليه لو شفته سواء بقي خطيبي جوزي حتي ولا أي حاجة من دول.

ده الحب وحش قوي بس عاجبني مش وحش علشان هو وحش لكن وحش علشان بيوقع في غلطات مننتبهش ليها ولا نفوقلها غير بعدين زي الإتنين اللي بيحبوا بعض ويقعوا في الحرام بس بعد كده لما بيفوقوا البنت بتضيع علشان حملت منه والولد بيفكر بعلاقنية بقي بيطلع العقل دلوقتي ويقول أنا أتجوز دي مستحيييييل.

هما الولاده كده أسهل من يبيع ويشتري لأنهم بكل بساطة لا بيحملوا ولا بيخالفوا ولا شرف ولا مش عارف إيه وبيخرجوا أي وقت براحتهم ومش بيفرق معاهم اي حاجة ولا يفرق حتي إنهم يتجوزوا مرتين تلاتة أربعة ده غير طبعا انهم مطلوبين في البلد علشان قلل عددهم وبقي اقل من البنات فبقوا حاجة نادرة كده ماشية في الشارع لما البنات بتشوفها بتتهبل عليهابكرة البنات يخطفوا الولاد من الشوارعوالبنت الغلبانة ياحبة عيني , لو اتمسكت ماشية مع واحدة بس ماشية معاه أو حتي مش ماشية واقفة معاه , لأ حتي مش واقفة معاه لو بتكلمه بس في الموبايل , لأ موبايل إيه , لو بتبصله حتي من بعيد , لأ بعيد إيه لو هيا راكبة الأتوبيس وهو راكب القطر ومعدي كده من جانبها زي أي حد يعني , يبقي يانهار أبيض العار العار , البت جابتلنا العار.

^^^^^^^^^^^^^^^^^^^^^^^^^

وتبدأ القصة من أول إن البنات يتغامزوا ويتلامزوا ويتكلموا معاها وقصادها , من أول أيوه ياعم , ومين ده , ومين اللي رنلك , وكنتي فين , وعملتي إيه , وهيا أصلا ولا تعرف حتي ولد يعني إيه.فتبدأ تلعب في دماغها فكرة أيوه ده أحمد اللي كان بيرنلي , ده حسام اللي كان بيشاورلي , ده مش عارف مين , وتمثل عليهم واشمعنة هيا يعني , وبعد كده الموضوع يتقلب جد علشان يصدقوها صحابها وتروح تتجرأ وتقف وتتكلم مع الولاد , وهيا وحظها بقي في اللي تقع فيه.أو العكس تكون هيا اصلا تعرف واحد وتبدأ البداية بإن صحباتها يتهامزوا ويتلامزوا قصادها , وبعد شوية من وراها ويطلعوا كلام وإشاعات وده أنا شوفت البت مش عارف مين ماشية مع مين حتي كانوا واقفين جنب الهول ومعبد أبو سمبل جمبهم علطول وبعديها راحوا يقزقزوا لب علي النيل , أيوه النيل اللي جنب سيتي ستارز , والله أنا شوفتهم بعيني.يا عيني يا عيني وياساتر علي عيون البنات .

برضه لسه البنت غلبانة علشان هيا الضحية في الأخر , لو اتجوزت مرة تبقي مستعملة خلاص , يعني لو جوزها مات ولا طلقها , يبقي سوري مش هاخد واحدة سكند هاند, علي رأيه مهو البنات مليين البلدتبص يمين وشمال كده تلاقي بنات بنات , تلاقي بنتين قاعدين يشدوا في واحد , وخمسة بيتخانقوا علي واحد , وعشرة بقي لو كان الواحد ده معاه عربية , ويالهوي لو كانت بي ام دبليو يبقوا 15 بنت في 30 كده , إحسبوها انتوا بقي.

وكلما ارتفع المستوي المادي للولد كل ما البنات اتهفت عليه أكتر إن شاء الله لو كان إيه.

^^^^^^^^^^^^^^^^^^^^^^^^^^^^^^^

والولاد بقي أنواع:في ولاد بيحبوا المنظرة والمرقعة وتلاقيهم مهتميين بنفسهم قوي ويسبلوا لدي ويبحلقوا لدي وتفتكرهم ياما هنا ياما هناك , وميمشوش مع أي حد , لأ لازم واحدة تليق بمظهرهم علشان متشوهوش ولا حاجة وطبعا الواحدة دي لازم تكون بتلبس بنطلون جينز ضيق وبودي مفتوح والكم لأ مفيش كم أساسا وأقل حاجة يقبلوها ميني جيب , وتكون فري يعني متوجعلهمش دماغهم كل شوية وتقعد تقول بابي ومامي هيموتوني علشان اتأخرت لأن أكيد لو كان عندها بابي ومامي مش هتقول الكلمة دي لأنها فري وعيلتها فري والحياة كلها فري.

ماعلينافي ولاد بقي بسم الله ماشاء الله : علم ونور وأدب واخلاق وإحترام : بس ملحوظة النوع ده للأسف انقرض خلاص , أنا سمعته عنه مرة في التمانينات , ماما حكيتلي عليهم , بصراحة مصدقتهاش , ربنا يرحمهم بقي , من بعدهم شباب مصر فسدوا.يلا معلش.

^^^^^^^^^^^^^^^^^^^^^^^^^^^^^^^^

بصراحة أنا إيدي وجعتني من الكتابة

هبقي أكمل بعدين بقي

^^^^^^^^^^^^^^^^^^^^^^^^^^^^^^^^